எம பயம் நீங்க பாட வேண்டிய அப்பர் பெருமான் தேவாரம்

எம பயம் நீங்க பாட வேண்டிய அப்பர் பெருமான் தேவாரம் 

 திருநீலக்குடி 

குறிப்பு :(மிருகண்டு முனிவர், அவரின் மனைவி புத்திரப் பேறு வேண்டி இறைவனை வழிபட்டு வந்தனர். அவர்கள் பக்திக்கு மெச்சி இறைவன் அவர்கள் முன் தோன்றி ஆயிரம் ஆண்டுகள் வாழும் துர்க்குணங்கள் நிறைந்த மகன் வேண்டுமா அல்லது 16 வயது வரை மட்டும் வாழும் தலைசிறந்த மகன் வேண்டுமா என்று கேட்க மிருகண்டு தமபதியினர் 16 வயது மகனே வேண்டும் என்று வரம் கேட்டனர். மிருகண்டு தம்பதியருக்கு இறைவன் அருளால் பிறந்த மார்க்கண்டேயர் சிறந்த சிவபக்தராக விளங்கினார். அவருக்கு 16 வயது நடக்கும் போது அவரின் பெற்றோர் இறைவன் கூறியபடி விதிக்கப்பட்ட ஆயுள் 16 வயது தான் என்பதை மார்க்கண்டேயருக்கு கூறினர். சிவபெருமானே அவரின் ஆயுளைக் காக்க முடியும் என்று மார்க்கண்டேயர் ஒவ்வொரு சிவஸ்தலமாக தரிசித்து வரும் போது திருநீலக்குடி தலத்திற்கும் வந்து ஈசனை வழிபட்டார். இங்கு வந்து நாளும் பொழுதும் சிவபெருமானை எண்ணி தியானிக்கிறார். முடிவில் இறைவன் அவர் முன் தோன்றினார். உனக்கு என்ன வரம் வேண்டும் என்று கேட்கிறார். மார்க்கண்டேயர் தமது விருப்பத்தை சொன்னவுடன் அதுபடியே மார்க்கண்டேயருக்கு இத்தலத்தில் சிரஞ்சீவியாக இருக்க ஈசன் வரம் அளித்தார். அத்தகைய சிறப்பு பெற்ற தலம் திருநீலக்குடி)

திருக்குறுந்தொகை

திருச்சிற்றம்பலம் 

1.வைத்த மாடும், மனைவியும், மக்கள், நீர் 

செத்தபோது, செறியார் பிரிவதே; 

நித்தம் நீலக்குடி அரனை(ந்) நினை 

சித்தம் ஆகில், சிவகதி சேர்திரே.

2.செய்ய மேனியன், தேனொடு பால்தயிர்- 

நெய் அது ஆடிய நீலக்குடி அரன், 

மையல் ஆய் மறவா மனத்தார்க்கு எலாம் 

கையில் ஆமலகக்கனி ஒக்குமே.

3.ஆற்ற நீள்சடை, ஆயிழையாள் ஒரு- 

கூற்றன்; மேனியில் கோலம் அது ஆகிய 

நீற்றன் நீலக்குடி உடையான்; அடி 

போற்றினார் இடர் போக்கும் புனிதனே.

4.நாலு வேதியர்க்கு இன் அருள் நன்நிழல் 

ஆலன்; ஆல நஞ்சு உண்டு கண்டத்து அமர் 

நீலன் -நீலக்குடி உறை நின்மலன்; 

காலனார் உயிர் போக்கிய காலனே.

5.நேச நீலக்குடி அரனே! எனா 

நீசராய், நெடுமால் செய்த மாயத்தால், 

ஈசன் ஓர் சரம் எய்ய எரிந்து போய், 

நாசம் ஆனார், திரிபுரநாதரே.

6.கொன்றை சூடியை, ழுகுன்றமகளொடும் 

நின்ற நீலக்குடி அரனே! எனீர்- 

என்றும் வாழ்வு உகந்தே இறுமாக்கும் நீர்; 

பொன்றும் போது நுமக்கு அறிவு ஒண்ணுமே?

7.கல்லினோடு எனைப் பூட்டி அமண்கையர் 

ஒல்லை நீர் புக நூக்க, என் வாக்கினால், 

நெல்லு நீள் வயல் நீலக்குடி அரன் 

நல்ல நாமம் நவிற்றி, உய்ந்தேன் அன்றே!

8.அழகியோம்; இளையோம்ழு எனும் ஆசையால் 

ஒழுகி ஆவி உடல் விடும் முன்னமே, 

நிழல் அது ஆர் பொழில் நீலக்குடி அரன் 

கழல் கொள் சேவடி கைதொழுது, உய்ம்மினே!

9.கற்றைச் செஞ்சடைக் காய் கதிர் வெண் திங்கள் 

பற்றிப் பாம்பு உடன் வைத்த பராபரன் 

நெற்றிக்கண் உடை நீலக்குடி அரன்; 

சுற்றித் தேவர் தொழும் கழல் சோதியே.

10.தருக்கி வெற்பு அது தாங்கிய வீங்கு தோள் 

அரக்கனார் உடல் ஆங்கு ஓர் விரலினால் 

நெரித்து, நீலக்குடி அரன், பின்னையும் 

இரக்கம் ஆய், அருள் செய்தனன் என்பரே.

திருச்சிற்றம்பலம்